撰文：娛樂組 攝影：娛樂突發組 美術：美術組

俗語話「朝中有人好辦事」，林珊珊長女，林海峰姨甥女李澄(西瓜)，在商台擔任DJ，除了有自己節目外，更被安排在森美、小儀主持的《早霸王》中開咪，商台人見到這位黃馬褂，亦只能忍得就忍，不過珊珊親生女在商台打橫行，連帶未來女婿朱穗傑，在商台內亦非常寸嘴，經常窒小儀，網民亦睇唔過眼，紛紛在討論區留言怒插傑傑，令他成為商台DJ中的負評王，不過珊珊就力撐傑傑「非常勤力，係有為青年」，一家人當正商台係自己屋企。

由森美和小儀主持的商台節目《早霸王》，一向甚受年青人歡迎，但自從加入「西瓜」和「傑傑」後，負評即多如雪花，節目被網民在多個討論區怒插，不過對象並非森美和小儀，而是「西瓜」和「傑傑」，但商台並未有從善如流，繼續讓二人留低，皆因花名「西瓜」的李澄，母親是林珊珊，舅父則是林海峰，以二人在商台的影響力，西瓜不但可以在《早霸王》內開咪，更有自己的節目《太陽從西瓜升起》、《在晴朗的一天出發─早安，同學早！》和《西瓜大發》，恨死唔少年輕DJ。

網民插黃馬褂

西瓜被網民怒插「轉數慢」、「照稿讀」，冇被叮走全靠媽咪林珊珊，但更令網民睇唔過眼，是連西瓜男友「傑傑」，一樣得到特別照顧。「傑傑」原名朱穗傑，跟西瓜一起在《早霸王》開咪，不過恃住女友西瓜的特殊身份，經常冇大冇細，多次寸小儀，令森美都睇唔過眼，在節目中力撐小儀，但礙於二人跟林珊珊及林海峰的關係，只有敢怒不敢言。「森美唔鍾意傑傑，好多聽眾都聽得出，語氣同態度都麻麻，加上家電台節目，網上可以睇到直播，見到森美經常對住傑傑黑面，早已經想換走佢。」知情人士透露。

商台高層力撐

森美在商台打工，身不由己，但網民對西瓜和傑傑就半點也不用客氣，在不同的討論區，網民紛紛留言力插，包括「傑傑同西瓜真係金童玉女，一樣冇料到」、「西瓜資質，報天氣就得，冇阿媽同舅父，邊度可以拍住森美做節目」、「傑傑日日等收工咁款，冇厘神氣又言之冇物」。不過天下無不是之兒女，在林珊珊眼中，女兒卻十分稱職，而對於未來女婿，更讚不絕口「佢非常勤力，成日開夜車，係有為青年」，珊珊和網民的睇法明顯是南轅北轍。

單親補償愛女

珊珊跟前夫李啟淦，在西瓜3歲時離婚，而珊珊帶著兩個女兒在港生活，母兼父職，女兒缺乏父愛，珊珊難免覺得虧欠女兒，所以對西瓜及細女李怡（花名野人），十分溺愛，西瓜想做DJ，珊珊遂千方百計推薦女兒，更藉森美和小儀的節目，讓愛女西瓜更多人認識，用心良苦。其實珊珊本身亦甚為忙碌，旗下藝人有鄭伊健、草蜢、林嘉欣等，日前下午2時，珊珊和林嘉欣一起在金鐘太古廣場食飯，同行還有幾位幕後電影人，估計是傾緊嘉欣新戲，約在3時半，珊珊和嘉欣偕同女助手先行離去，一行人登上七人車後，消失無蹤。