Profile：外號「3家姐」，由廿歲開始做藝人保母，曾為多位當紅藝人工作，聽盡圈中秘聞。

在娛樂圈要生存，最緊要識埋堆，若然成日做「獨家村」或者「孤獨精」，真係好難撈得起，而圈中人好鍾意約埋飯局或者食火鍋，一班人圍住吹水、劈酒，聯絡一下感情，熟絡下次有筍job咪預埋一份囉。不過圈中有位大隻男星「波仔」，佢都會同劇中拍檔或者工作人員一齊開餐，但每次打邊爐，佢都有特別order，唔係話佢要食乜特別火鍋料，而係佢每次無論同幾多人一齊烚下烚下，佢都要自己另外用一個鍋，當然開多個鍋湯底錢要另計啦，不過錢銀事小，大家都覺得「波仔」麻煩，同埋覺得佢有潔癖，好似驚其他人唔夠乾淨咁，久而久之，大家只要係去打邊爐，就一定唔會預「波仔」。後尾「波仔」同相熟記者朋友，自爆自己呢個怪癖，原來「波仔」有苦自己知，皆因佢有腸胃敏感，只要食到牛肉，或者熬出牛肉湯，佢都即時要去廁所，唔通打邊爐唔俾人食肥牛咩？所以佢咪自己用私家鍋囉，而佢班圈中朋友知道之後，先知怪錯佢，仲鬼咁唔好意思，要請佢食飯補數添。