Profile：外號「3家姐」，由廿歲開始做藝人保母，曾為多位當紅藝人工作，聽盡圈中秘聞。

大部分市民，都想有日天降橫財，中六合彩、三T咁，下半世可以印印腳唔使做，所以投注站長期都好多人打蠆。其實真正有錢人，反而非常勤力，佢追求已經唔係錢，而係成就感。好似圈中有位富貴男星「阿帥」，佢老豆大把生意，身家過百億，使十世都使唔晒隻，偏偏「阿帥」就要做明星，唔肯接手老豆盤生意，只能講句「呢機會唔係屬於大家」，而「阿帥」自少已經住大屋，食係山珍海味，對於普通人講，梗係羨慕佢啦，但事實係「阿帥」反而鍾意扮平民，仲叫人唔好成日提住佢家底，而「阿帥」仲有一樣嗜好，就係鍾意街頭小食，咖喱魚蛋、燒賣更加係佢至愛，不過佢始終都係大明星，要佢街邊篤魚蛋就冇可能，但佢就會叫司機車佢去便利店，戴晒口罩咁入去，叫魚蛋、燒賣做外賣，上到車先慢慢享用，所以若然粉絲要同佢「集郵」，唔使去名店，只要巡下各區便利店，分分鐘可以遇上「阿帥」，見下明星。