俗語話「患難見真情」，尤其跟紅頂白，一沉百踩娛樂圈，只要有少少負面新聞，其他人都會視當事人為瘟神，人人避之則吉，過往稱兄道弟，緋聞男女，也可以變成陌路人，而呢個時候肯無懼旁人眼光，而力撐該位藝人，關係就肯定非比尋常，好似男星房祖名在北京涉毒，就只有佢前女友薛凱琪對佢不離不棄。

全 世界都知房祖名跟薛凱琪有過一段情，但係佢為乜而分手，就真係耐人尋味，冇乜人知。本刊2007年1月封面故事《溝仔洩慾出禍 房祖名怒掟薛凱琪》，就獨家揭破佢分手真相，原來房祖名同薛凱琪因為合作電影《早熟》撻著，拍拖梗係糖黐豆啦，但後來祖名發覺女方好聽就係體貼同緊張祖名，實際上就非常黐身，祖名去同朋友飲杯，女友都要check住，知道地點之後，又會突然現身，搞到祖名班朋友面前甚為冇癮，感情慢慢開始變淡，而薛凱琪當時又同tomboy打扮女助手出雙入對，諗住激下祖名，點知就玩出火，最後呢段戀情亦唔能夠繼續落去。

房祖名同薛凱琪分手之後，佢「再見仍是朋友」，但都只係間中見下面，估唔到祖名出事，薛凱琪會身力撐前度男友，而祖名出獄後，就一直隱居避世，現在身處何方都冇乜人知，但薛凱琪早排去北京同台灣拍戲，就話曾經見過祖名，但佢就唔肯透露確實地點，只係話祖名不停努力寫歌，佢仲聽過祖名非常感人新歌，祖名跟薛凱琪似乎感情更勝往昔，分分鐘舊情復熾，再續未了緣。