4月1日係哥哥張國榮逝世13周年，古巨基（基仔）出席在4月2日晚舉行一個名為《哥迷會 由零開始 繼續寵愛 張國榮》紀念活動。基仔同哥哥感情十分好，當基仔演唱《明星》一曲時一度哽咽，後來到陳太（哥哥前經理人陳淑芬）一講，基仔直情忍唔住爆喊，場面真係好感人。

今次活動只有基仔一位歌手出席，而且只播放舊片，基仔：「陳太話呢次係以私人聚會形式舉行，等哥迷聚埋一齊。同埋活動上籌到錢，會用將哥哥物件修復，我之前同陳太聚會，都同佢講有咩需要我都樂意幫手。」

基仔仲有意年尾推出向哥哥致敬大碟，選曲方面，基仔話都幾難決擇，咁梗係喇，哥哥咁多名曲，好姨淨係去卡拉ok點哥哥歌，都點到頭暈喇，基仔就話，「無論係快歌定慢歌都想唱，比如《風繼續吹》、《有心人》、《黑色午夜》，細個好鍾意唱。」

而陳太4月1日亦有同數百位來自香港、內地、海外「哥迷」聯同陳家豪、好友連炎輝、羅文兩位姊妹一齊去寶福山寶禪堂致祭，向偶像獻上鮮花、心意卡、千羽鶴及各式祭品。