俗語話「男人最怕入錯行，女人最怕嫁錯郎」，尤其係圈中女星，有樣有身材，當然想揀個富二代，嫁入豪門做少奶奶，咪可以印印腳唔使做囉。但人同此心，呢個世界又邊有咁多鑽石筍盤，而女星到適婚年齡，往往等唔切，遇上心水、合眼緣男士，就匆匆咁拉埋天窗，好似去年7月嫁人葉翠翠，就係同「平民董事」周曉東(Raymond)結婚，婚後仲非常之恩愛，羨煞旁人。

本來結婚係開心事，偏偏葉翠翠就帶有愁容，原來老公Raymond同前妻因贍養費問題糾纏不清，大把手尾跟。去年7月本刊封面故事《窮嫁空心金龜 葉翠翠倒貼贍養費》，當時就直擊翠翠婚禮實況，發現翠翠結婚行頭，只得手上戒指仔，非常寒酸。最麻煩係Raymond同前妻Grace在2009年離婚，當時Raymond已被分去一半身家，跟住要每個月俾贍養費，其後二人為贍養費數目多寡，要鬧上法庭，由於老公要出席家事法庭聆訊，搞到翠翠連蜜月都冇得去，令呢段美好婚姻蒙上污點。

翠翠老公一直被誤傳擁有建築師樓，其實佢只係一名打工仔，副董事只係掛名性質，跟做明星翠翠相比，身家當然係小巫見大巫，但翠翠有感遇上真愛，對於老公要支付前妻贍養費，佢亦唔介意幫忙，情比金堅。

翠翠結婚大半年，積極造人，家陣自爆唔食得生冷，又話有好消息唔講得住，好大機會已經懷孕，只係等過BB小器期，相信會有喜訊同大家公布，可喜可賀。